سندريلّا / إيلينا رينغو / روسيّة غادرت روسيّا 1904 / هيّ رسّامة وصحافيّة وناشرة
تعي !
يمكنْ يصيرْ لْ وقتْ
حافي على جريكي!
وما تجي...
ويمكنْ إذا جيتي
يصيرْ لْ وعدْ
عم يلتفتْ ليكي...
وشويْ
ما تسألي شو لونْ
فسطانِكْ...
مين بدو ينطرْ لْ فسطان؟
مشتاق
لونِكْ تحتْ
قمصانِكْ...
مشتاقْ لو تجي...
لشو تتردّدي
لْ بكرا ما بينطر
تجي...
بيروحْ
بيصير متل لْ خوابي
لْ فاضيي
بلا نبيدْ...
ويمكنْ لْ بكرا
يصيرْ
-
لو تجي – شي عيدْ
معلّق عَ حيطانْ لْ شوقْ
ومشتاقْ لو إنّكْ
تجي
ومشتاق لا تتلجلجي...
قولِكْ بعدو لْ زمانْ
بيذكر حساسين لْ حلا
كيفْ صارْ ريشن
يلوّن جريكي
حتى ما يعودْ لْ زمان
حافي
وتجي...
وما تجي
أحلى !
بيضل لْ شوق ناطر
على حفافي لْ عيونْ
بيضلْ
متل شي غنيي
ما تصيّدا عاشق
كبيرْ
بيضل مهوشلْ
متل عشتروتْ
عم تفتش ع حبيبا...
لْ بكرا دايمًا
بيبقى بردانْ
وبيضل حافي
لأنْ جريكي ت تجي
ناقصن سكربينة
سندريلا...
يللي بيتدوب قبل ما
يغفى لْ قمر بنص لْ حلم...
ما تجي
بيضل حرقا بقلبِك
وبقلبي...
لْ حبّ بلا حرقا ما
بيقشع حالو حبّ...
لْ عشق لازم يتألم
تَ يصيرْ عشقْ/
لْ عشق مجنون بلا
جنونْ/
حكاية ما بتكتمل إلا
معكِ ...
وهيكْ ما تجي
تَ ضل أنطرْ إنَكْ
جايي...
أَيْ متى
وصلتي وأنا بعدني
ناطرْ؟؟؟
كيف جيتي ؟؟؟
وأنا لاحق غبرة لْ طريق
يللي مرقتِ عليا/
لملما تَ أحتفظ فيا
غنيّة موشح
لأحلام غمرتا زنودنا/
متل شي نسيم غمر
حالو ...
ومتل شي حبقا
ما قادرا تشم طربون
فوق راسا...
تعي دخيلك
بيخلص لْ وقت
وبيرجع لْ موعد حافي
وإنتِ معي...
ميشال
مرقص
9
شباط 2021
ليست هناك تعليقات:
إرسال تعليق