الحبُّ ما بيخضع لَ تفسيرْ
Gustav Klimt (July 14,
1862 – February 6, 1918)
أوقاتْ بيقعدْ الحبّْ لحالو
على رصيف الفكر...
أوقاتْ بيسألْ حالو
ليش ما بتتلاقى القلوب بحسبْ دَوران أفلاك العاطفي؟
وبيصير الحب محتارْ
يفتش عن أجوبي
وما بيلاقي منطق لشي ...
كل يللي بيعرفو الحبّ
أنو "هوّي" ما بيتغيّر/
حلاه أنّو الحب الجايي من حالو لحالو...
ما بيعرف
ليه بيخلّي قلبْ يُخفق لَ حَبيبْ،
وبيخلّي عين تدمع فرحْ أو شَوْقْ..
وبيخلّي
المشتاقْ يضِيقْ نَفَسُو
ويشعرْ أنو رحْ يختنق ...
وبخلّي القلقْ متل تكّاتْ الثواني بين الدماغْ والقلب...
وبيخلّي العتبْ
متل شي صَلا للنَدامِي...
هيدا الحب
ما بيعرفْ شبّْ أو خِتْيارْ
صبيِّي أو غير صبيِّي...
الأعمارْ متل بعضا عندْ الحبْ...
الأجناس ما بتِخْتِلِفْ...
الحالاتْ ما بتشكّلْ حواجزْ قدّام هالساحر يلِّلي بيِتْغَلْغَلْ لجُوّا
وما بيعود يخلِّلي قدامنا طريقْ للهرَبْ...
كل الحالاتْ بتِبْقى واقفِي
على شوارْ الإختيارْ...
كيف ما وقَعْ الواحدْ بيجِي بقلب هالعِشْقْ المفرَّخْ على حيطان النَفْس/
يللي عم تولد من جديد...
بيوقع بحِضْنْ العاطفي لْ ناطرا على شبّاك الشوقْ ت تفتح زهور الَّلهْفي...
بيفرّخ على جبين البسمي لْ ناطِرا /
عاشقْ حاملْ شمعةْ أحزانو حتى يضحك لَ نورْ الشمسْ...
ما حدا يسأل الحب: ليش؟
الحبّ
منعيشو ...
هوي ما بيعرف حالو...
هو ما بيخضع لَ مفهوم...
"المفهوم" تحديد مادّي...
الحبّ
"حبّ"
ما بيخضع لَ تفسيرْ ...
وهيكْ...
ميشال مرقص
Wawww ra2e33333 ra2e333. Ra2e33333👌👌👌👌👏👏👏👏❤️
ردحذف