شمّة عطر – 7
(همسات حب بالمحكي)
Friedrich von Amerling (1803-1887)
1
لمّا لْ غيابْ
بينكُزْ جنوني...
تَ إحْلَمِكْ...
مطْرَحْ ما بِ تكوني...
بشدُّنْ عَ إيديكِ/ صدى أحلامْ
بْ فرفِكْ عيوني/
بقولْ نسيوني...
بِ غْمُرْ حضورِكْ
ولْ حِلِمْ
ما نامْ...
ناطرْ
تجي عَ فيّة عيوني...
وعَ لونْ وجِّكْ أنْطًرْ لْ أنغامْ...
تدَهْدِهْ خيالي/
تصيرْ موزوني...
تَ أغمرِكْ/
ضلّي تِجي أوهامْ
كلّ ما لْ غروب بْ فيّتِكْ بِ يْطلّْ
أشْعُرْ
دروبْ لْ شوقْ مجنوني...
2
طلّي/
شو حِلوينْ عينيكِ...
كلّنْ حكي/
مَطْرَحْ مَ هَـ لْ ياسمينْ/
عَ ديكي/
يِتْكي تَكي...
ضلّي/
اهتمامي قطّفْ زرارِكْ/
وعَ موسمِكْ ...
خَلّي/
- يِمكنْ شي زرّْ –
يخبّرْ سرارِكْ...
- زرّين؟
خلّي لِلعشقْ زرّينْ!
إنتِ وأنا
وشهقاتْ أخبارِكْ...
3
كنتي حلا،
وشو ضحتِك تِغوي...
لونْ لْ عِشِقْ
مرهونْ بِ لْ صِدفي...
ومتلْ لْ وعدْ
بيطلْ
وبْ يِخفي...
عِطرْ لْ نطَرْ تً يِعشَقِكْ
(نِتفي) ...
أو شي حِلِمْ
عَ موعدو
بْ يِضوي
عشقْ لْ بِ وجّكْ – شوقْ
وبْ يطفي...
ميشال مرقص
ليست هناك تعليقات:
إرسال تعليق